Aṣṭamaḥ sargaḥ
Technical Details
aṣṭamaḥ sargaḥ
strī-vighna
atha nandamadhīralocanaṃ gṛhayānotsukamutsukotsukam|
abhigamya śivena cakṣuṣā śramaṇaḥ kaściduvāca maitrayā||1||
kimidaṃ mukhamaśrudurdinaṃ hṛdayasthaṃ vivṛṇoti te tamaḥ|
dhṛtimehi niyaccha vikriyāṃ na hi bāṣpaśca śamaśca śobhate||2||
dvividhā samudeti vedanā niyataṃ cetasi deha eva ca|
śrutavidhyupacārakovidā dvividhā eva tayościkitsakāḥ||3||
tadiyaṃ yadi kāyikī rujā bhiṣaje tūrṇamanūnamucyatām|
viniguhya hi rogamāturo nacirāttīvramanarthamṛcchati||4||
atha duḥkhamidaṃ manomayaṃ vada vakṣyāmi yadatra bheṣajam|
manaso hi rajastamasvino bhiṣajo'dhyātmavidaḥ parīkṣakāḥ||5||
nikhilena ca satyamucyatāṃ yadi vācyaṃ mayi saumya manyase|
gatayo vividhā hi cetasāṃ bahuguhyāni mahākulāni ca||6||
iti tena sa coditastadā vyavasāyaṃ pravivakṣurātmanaḥ|
avalambya kare kareṇa taṃ praviveśānyatarad vanāntaram||7||
atha tatra śucau latāgṛhe kusumodgāriṇi tau niṣedatuḥ|
mṛdubhirmṛdumāruteritairupagūḍhāviva bālapallavaiḥ||8||
sa jagāda tataścikīrṣitaṃ ghananiśvāsagṛhītamantarā|
śrutavāgviśadāya bhikṣave viduṣā pravrajitena durvacam||9||
sadṛśaṃ yadi dharmacāriṇaḥ satataṃ prāṇiṣu maitracetasaḥ|
adhṛtau yadiyaṃ hitaiṣitā mayi te syāt karuṇātmanaḥ sataḥ||10||
ata eva ca me viśeṣataḥ pravivakṣā kṣamavādini tvayi|
na hi bhāvamimaṃ calātmane kathayeyaṃ bruvate'pyasādhave||11||
tadidaṃ śrṛṇu me samāsato na rame dharmavidhāvṛte priyām|
girisānuṣu kāminīmṛte kṛtaretā iva kinnaraścaran||12||
vanavāsasukhāt parāṅmukhaḥ prayiyāsā gṛhameva yena me|
na hi śarma labhe tayā binā nṛpatirhīna ivottamaśriyā||13||
atha tasya niśamya tadvacaḥ priyabhāryābhimukhasya śocataḥ|
śramaṇaḥ sa śiraḥ prakampayannijagādātmagataṃ śanairidam||14||
kṛpaṇaṃ bata yūthalālaso mahato vyādhabhayād viniḥsṛtaḥ|
pravivikṣati vāgurāṃ mṛgaścapalo gītaraveṇa vañcitaḥ||15||
vihagaḥ khalu jālasaṃvṛto hitakāmena janena mokṣitaḥ|
vicaran phalapuṣpavadvanaṃ pravivikṣuḥ svayameva pañcaram||16||
kalabhaḥ kariṇā khalūddhṛtoḥ bahupaṅkād viṣamānnadītalāt|
jalatarṣavaśena tāṃ punaḥ saritaṃ grāhavatīṃ titīrṣati||17||
śaraṇe sabhujaṅgame svapan pratibuddhena pareṇa bodhitaḥ|
taruṇaḥ khalu jātavibhramaḥ svayamugraṃ bhujagaṃ jighṛkṣati||18||
mahatā khalu jātavedasā jvalitādutpatito vanadrumāt|
punaricchati nīḍatṛṣṇayā patituṃ tatra gatavyatho dvijaḥ||19||
avaśaḥ khalu kāmamūrcchayā priyayā śyenabhayād vinākṛtaḥ|
na dhṛtiṃ samupaiti na hriyaṃ karuṇaṃ jīvati jīvajīvakaḥ||20||
akṛtātmatayā tṛṣānvito ghṛṇayā caiva dhiyā ca varjitaḥ|
aśanaṃ khalu vāntamātmanā kṛpaṇaḥ śvā punarattumicchati||21||
iti manmathaśokakarṣitaṃ tamanudhyāya muhurnirīkṣya ca|
śramaṇaḥ sa hitābhikāṅkṣayā guṇavad vākyamuvāca vipriyam||22||
avicārayataḥ śubhāśubhaṃ viṣayeṣveva niviṣṭacetasaḥ|
upapannamalabdhacakṣuṣo na ratiḥ śreyasi ced bhavettava||23||
śravaṇe grahaṇe'tha dhāraṇe paramārthāvagame manaḥśame|
aviṣaktamateścalātmano na hi dharme'bhiratirvidhīyate||24||
viṣayeṣu tu doṣadarśinaḥ parituṣṭasya śuceramāninaḥ|
śamakarmasu yuktacetasaḥ kṛtabuddhena ratirna vidyate||25||
ramate tṛṣito dhanaśriyā ramate kāmasukhena bāliśaḥ|
ramate praśamena sajjanaḥ paribhogān paribhūya vidyayā||26||
api ca prathitasya dhīmataḥ kulajasyārcitaliṅgadhāriṇaḥ|
sadṛśī na gṛhāya cetanā praṇatirvāyuvaśad gireriva||27||
spṛhayet parasaṃśritāya yaḥ paribhūyātmavaśāṃ svatantratām|
upaśāntipathe śive sthitaḥ spṛhayeddoṣavate gṛhāya saḥ||28||
vyasanābhihato yathā viśet parimuktaḥ punareva bandhanam|
samupetya vanaṃ tathā punargṛhasaṃjñaṃ mṛgayeta bandhanam||29||
puruṣaśca vihāya yaḥ kaliṃ punaricchet kalimeva sevitum|
sa vihāya bhajeta bāliśaḥ kalibhūtāmajitendriyaḥ priyām||30||
saviṣā iva saṃśritā latāḥ parimṛṣṭā iva soragā guhāḥ|
vivṛtā iva cāsayo dhṛtā vyasanāntā hi bhavanti yoṣitaḥ||31||
pramadāḥ samadā madapradāḥ pramadā vitamadā bhayapradāḥ|
iti doṣabhayāvahāśca tāḥ kathamarhanti niṣevaṇaṃ nu tāḥ||32||
svajanaḥ svajanena bhidyate suhadaścāpi suhṛjjanena yat|
paradoṣavicakṣaṇāḥ śaṭhāstadanāryāḥ pracaranti yoṣitaḥ||33||
kulajāḥ kṛpaṇībhavanti yadyadayuktaṃ pracaranti sāhasam|
praviśanti ca yaccamūmukhaṃ rabhasāstatra nimittamaṅganāḥ||34||
vacanena haranti valgunā niśitena praharanti cetasā|
madhu tiṣṭhati vāci yoṣitāṃ hṛdaye hālahalaṃ mahadviṣaśam||35||
pradahan dahano'pi gṛhyate viśarīraḥ pavano'pi gṛhyate|
kupito bhujago'pi gṛhyate pramadānāṃ tu mano na gṛhyate||36||
na vapurvimṛśanti na śriyaṃ na matiṃ nāpi kulaṃ na vikramam|
praharantyaviśeṣataḥ striyaḥ sarito grāhakulākulā iva||37||
na vaco madhuraṃ na lālanaṃ smarati strī na ca sauhṛdaṃ kvacit|
kalitā vanitaiva cañcalā tadihāriṣviva nāvalambyate||38||
adadatsu bhavanti narmadāḥ pradadatsu praviśanti vibhramam|
praṇateṣu bhavanti garvitāḥ pramadāstṛptatarāśca māniṣu||39||
guṇavatsu caranti bhartṛvad guṇahīneṣu caranti putravat|
dhanavatsu caranti tṛṣṇayā dhanahīneṣu carantyavajñayā||40||
viṣayād viṣayāntaraṃ gatā pracaratyeva yathā hṛtāpi gau|
anavekṣitapūrvasauhṛdā ramate'nyatra gatā tathāṅganā||41||
praviśantyapi hi striyaścitāmanubadhnantyapi muktajīvitāḥ|
api bibhrati caiva yantraṇā na tu bhāvena vahanti sauhṛdam||42||
ramayanti patīn kathañcana pramadā yāḥ patidevatāḥ kvacit|
calacittatayā sahastraśo ramayante hṛdayaṃ svameva tāḥ||43||
śvapacaṃ kila senajitsutā cakame mīnaripuṃ kumudvatī|
mṛgarājamatho bṛhadrathā pramadānāmagatirna vidyate||44||
kuruhaihayavṛṣṇivaṃśajā bahumāyākavaco'tha śambaraḥ|
munirugratapāśca gautamaḥ samavāpurvanitoddhataṃ rajaḥ||45||
akṛtajñamanāryamasthiraṃ vanitānāmidamīdṛśaṃ manaḥ|
kathamarhati tāsu paṇḍito hṛdayaṃ sañjayituṃ calātmasu||46||
atha sūkṣmamatidvayāśivaṃ laghu tāsāṃ hṛdayaṃ na paśyasi|
kimu kāyamasadgṛhaṃ sravad vanitānāmaśuciṃ na paśyasi||47||
yadahanyahani pradhāvanairvasanaiścābharaṇaiśca saṃskṛtam|
aśubhaṃ tamasāvṛtekṣaṇaḥ śubhato gacchasi nāvagacchasi||48||
athavā samavaiṣi tattanūmaśubhāṃ tvaṃ na tu saṃvidasti te|
surabhiṃ vidadhāsi hi kriyāmaśucestatprabhavasya śāntaye||49||
anulepanamañjanaṃ srajo maṇimuktātapanīyamaṃśukam|
yadi sādhu kimatra yoṣitāṃ sahajaṃ tāsu vicīyatāṃ śuci||50||
malapaṅkadharā digambarā prakṛtisthairnakhadantaromabhiḥ|
yadi sā tava sundarī bhavenniyataṃ te'dya na sundarī bhavet||51||
stravatīmaśuciṃ spṛśecca kaḥ saghṛṇo jarjarabhāṇḍavat striyam|
yadi kevalayā tvacāvṛtā na bhavenmakṣikapatramātrayā||52||
tvacaveṣṭitamasthipañjaraṃ yadi kāyaṃ samavaiṣi yoṣitām|
madanena ca kṛṣyase balādaghṛṇaḥ khalvadhṛtiśca manmathaḥ||53||
śubhatāmaśubheṣu kalpayan nakhadantatvacakeśaromasu|
avicakṣaṇa kiṃ na paśyasi prakṛtiṃ ca prabhavaṃ ca yoṣitām||54||
tadavetya manaḥśarirayorvanitā doṣavatīrviśeṣataḥ|
capalaṃ bhavanotsukaṃ manaḥ pratisaṃkhyānabalena vāryatām||55||
śrutavān matimān kulodgataḥ paramasya praśamasya bhājanam|
upagamya yathā tathā punarna hi bhettuṃ niyamaṃ tvamarhasi||56||
abhijanamahato manasvinaḥ priyayaśaso bahumānamicchataḥ|
nidhanamapi varaṃ sthirātmanaścyutavinayasya na caiva jīvitam||57||
baddhvā yathā hi kavacaṃ pragṛhītacāpo,
nindyo bhavatyapasṛtaḥ samarād rathasthaḥ|
bhaikṣākamabhyupagataḥ parigṛhya liṅgaṃ,
nindyastathā bhavati kāmahṛtendriyāśvaḥ||58||
hāsyo yathā ca paramābharaṇāmbarastrag bhaikṣaṃ caran dhṛtadhanuścalacitramauliḥ|
vairūpyamabhyupagataḥ parapiṇḍabhojī hāsyastathā gṛhasukhābhimukhaḥ satṛṣṇaḥ||59||
yathā svannaṃ bhuktvā paramaśayanīye'pi śayito,
varāho nirmuktaḥ punaraśuci dhāvet paricitam|
tathā śreyaḥ śrṛṇvan praśamasukhamāsvādya guṇavad,
vanaṃ śāntaṃ hitvā gṛhamabhilaṣet kāmatṛṣitaḥ||60||
yatholkā hastasthā dahati pavanapreritaśikhā yathā pādākrānto daśati bhujagaḥ krodharabhasaḥ|
yathā hanti vyāghraḥ śiśurapi gṛhīto gṛhagataḥ tathā strīsaṃsargo bahuvidhamanarthāya bhavati||61||
tadvijñāya manaḥśarīraniyatānnārīṣu doṣānimān,
matvā kāmasukhaṃ nadījalacalaṃ kleśāya śokāya ca|
dṛṣṭvā durbalamāmapātrasadṛśaṃ mṛtyūpasṛṣṭaṃ jagan-
nirmokṣāya kuruṣva buddhimatulāmutkaṇṭhituṃ nārhasi||62||
saundarananda mahākāvye "strī-vighna" nāma aṣṭama sarga samāpta|